છેલ્લાં લગભગ બે વર્ષ કે એથીય વધુ સમયથી શહેરના નેશનલ હાઇવે પાસેના રેલવે નાલામાં ગટરનું ગંદુ પાણી ભરાય રહેવાની જે સમસ્યા હતી તે હવે આટલા સમય બાદ સમાધાન તરફ આગળ વધી રહી છે.
તાજેતરમાં જ વાંકાનેર નગરપાલિકા દ્વારા ઉપરોક્ત રેલવે નાલાની સફાઈ કામગીરી હાથ ધરવામાં આવી છે. પ્રાપ્ત માહિતી અનુસાર બન્ને રેલવે નાલા પૈકી ભાટિયા સોસાયટી તરફનાં નાલાની સફાઈ કરી દેવામાં આવી છે જ્યારે સામેની બાજુનાં રેલવે નાલાની સફાઈ કામગીરીનું કામ પ્રગતિ પર છે.
અત્રે ઉલ્લેખનીય છે કે વાંકાનેર નેશનલ હાઇવે પાસેનાં ઉપરોક્ત રેલવે નાલામાં છેલ્લા બે વર્ષ કે એથીયે વધુ સમયથી સફાઈ ન થતી હોય લગભગ એકાદ ફૂટ જેટલા ગટરના ગંદા પાણીના ખાબોચિયા ભરાયેલા રહેતા હતા જેના કારણે અસહ્ય ગંદકી ફેલાઈ રહી હતી. જે અંગે તંત્રને આળસ મરડી સફાઈ કરવા વિવિધ ક્ષેત્રનાં જન પ્રતિનિધિઓ દ્વારા અવારનવાર રજુઆત કરવામાં આવી હતી. ત્યાં સુધી કે ગટરનાં પાણીની સફાઈ જેવા મામુલી કામ માટે પણ છેક મુખ્યમંત્રી કાર્યાલય સુધી લેખિત રજૂઆતો પહોંચી હતી.
ત્યારે હવે નગરપાલિકાનાં નવનિયુક્ત પ્રમુખ, ઉપપ્રમુખની નિમણુંક થતાની સાથે જ બે વર્ષ જૂની આ લોક સમસ્યા પર ધ્યાન અપાયું છે જે આવકારદાયક છે.
આશા રાખીએ કે તંત્ર દ્વારા ઉપરોક્ત રેલવે નાલા અને આજુબાજુના વિસ્તારોની સમયાંતરે સફાઈ કરવામાં આવે અને કામગીરી પર નજર રાખવામાં આવે. જેથી કરીને લોકોને વિના વાંકે હાલાકી ભોગવવી ન પડે. (Photo Credit (L) - Kaptaan).
લેખક વિષે ↴
પરિચય : લેખક આપણું-વાંકાનેર.કોમ નાં ફાઉન્ડર તથા Global Gujarat News | News of Gujarat | The Desi Times | TwoCircles.net | ના પૂર્વ રિપોર્ટર છે.
સંપર્ક : - 9898 11 3634
